ბათუმი თამუნაზე და ვახოზე ალაპარაკდა

ორი თვის წინათ, ლუდსახარშ „მირზაანი“-ს გახსნაზე, „ღამის შოუ“-ს ბიჭები და „შუა ქალაქის“ მსახიობები შეგვხვდნენ. მაშინ ვახო ბიჭიკაშვილმა გვითხრა: „არსებობს ადამიანი, რომელიც ძალიან მომწონს, მასაც მოვწონვარ და ერთად ვართ. მეტი არაფერი. არც ცოლია, არც შეყვარებული...“ ამის მერე, ვახო „სერიალის მსახიობებს შეერია, თამუნა ნიკოლაძეს დიდხანს ელაპარაკა და წასვლის წინ გარეთაც გააცილა. რა თქმა უნდა, ეს ამბავი არ გამოგვეპარა და სურათიც გადავუღეთ....

ახლა ამბობენ „შუა ქალაქი“-ს ქეთევან ღლონტს და ვახო ბიჭიკაშვილს რომანი აქვთო. ამ თემაზე თბილისში უფრო აქტიურად ბათუმის „ჯაზ-ფესტივალის“ მერე დაიწყეს ჭორაობა. თითქოს წყვილი იქ ერთად იყო ჩასული და საკმაოდ საეჭვოდაც იქცეოდა. ხშირად განმარტოებით ისხდნენ და ერთმანეთის მიმართ გრძნობას არ მალავდნენ... ყველაზე მეტად ხალხს, მათი ასაკი მოხვდა თვალში, თამუნა ვახოზე 9 წლით უფროსია.

32 წლის თამუნა ნიკოლაძემ და 23 წლის ვახო ბიჭიკაშვილმა ერთმანეთი, დიდი ხნის წინათ, თეატრალურ უნივერსიტეტში გაიცნეს. საერთო მეგობარიც ბევრი ჰყავთ და საზოგადოებაში ერთად ხშირად ჩნდებიან. თუმცა, რომანს ორივე უარყოფს.

თამუნა ნიკოლაძე: „ძალიან მაინტერესებს ვინ გითხრათ ეს ამბავი? ჩამისაფრდნენ „ტიპები“? ჭორია და მეცინება. ვახო ჩემი დიდი ხნის მეგობარია. მართალია სხვადასხვა თაობას ვეკუთვნით, მაგრამ ერთმანეთს თეატრალური უნივერსიტეტიდან ვიცნობთ. საერთო მეგობარიც ბევრი გვყავს.

– ბათუმში ერთად არ ყოფილხართ?

– ბათუმში ვიყავით, მაგრამ ვახოს გარდა კიდევ ბევრი ჩვენი მეგობარი იყო, მათ შორის ჩემი დაც. სხვა საეჭვო ვერავინ შენიშნეს? რაც ეკრანზე გამოვჩნდი ჩემზე ჭორი არ გამიგია. მერიდება, ეს ამბავი ვახომ რომ გაიგოს, უხერხულ მდგომარეობაში ჩავარდება. მე მეცინება და იმედი მაქვს ვახოსაც გაეცინება“.

– რატომ გავრცელდა თქვენზე ეს ჭორი, ნასვამები ხომ არ იყავით?

– როგორ მაინტერესებს ვინ მოგაწოდათ ეს ინფორმაცია. ნეტა საიდან მოიტანეს. ვახოს კი უყვარს დალევა და ხშირად ვქეიფობთ ხოლმე, მაგრამ მე საერთოდ არ ვსვამ. ისე ვახო ძალიან საყვარელია და ერთად ხშირად ვერთობით.

– ანუ შენს ცხოვრებაში სიახლე არ არის?

– თამუნა არავისზეა შეყვარებული. ისვენებს, ძალიან კარგად გრძნობს თავს და სექტემბერში ძალიან მაგარი ახალი როლისთვის ემზადება თეატრში. ალბათ, ჩემს შემოქმედებაზე მეტად, ჩემი პირადი ცხოვრება გაინტერესებთ, ამიტომ სიახლე თუ იქნება, არ დავმალავ. ვახო იქნება ეს, თუ პეტრე, ექსკლუზიურად თქვენ შეგატყობინებთ.



ვახო ბიჭიკაშვილი: „რა ხართ ეს „პრაიმტაიმი“? თბილისი ჭორების ქალაქია და ესეც მორიგი ჭორია. არაფერი ხდება ჩვენს შორის. ბათუმში მარტო არ ვყოფილვართ წასულები. ბევრი საერთო მეგობარი გვყავს და ხშირად ერთად გვიწევს ყოფნა. ისე სულ ცნობილ ხალხთან მაკავშირებენ. ხან ვისი „შეყვარებულობა“ დამაბრალეს და ხან ვისი“.